|
Létste update: 18 fibrewari 2026 - Dolle Dinsdig
Waat geit dur allemaol
gebeure en waat is dur allemaol gebeurdj?
Noe nog allein opruume en
aafbraeke en den nog eine vette hiëring hoole desenaovendj en den is
alles weer veurbie. Wae kieëke teruk op eine sjoeëne vastelaovendj
en waat höbbe wae geluk gehadj mit ut waer! Ein flinke plensbui veur
de optocht, tieëdes de optocht ein straolendje zon (aaf en toe) en
nao de optocht nog get druppelkes. Eine sjieke optocht dae door de
straote van Haler trok en daonao en spetterendj fieëske in ut
Rabbedabbe Pelieës. Jaomer van dae sukkel van eine vrachtwagesjefeur
dae meindje zich tusse de optochtdeilnömmers te motte wringe. Mer
dae haaj gein optochtnummer dus deej neet mit veur de prieëze ;-).
Ut programma veur ut
komendje sezoeën gaon wae binnekort weer samestelle en den weer hie
oppe sait publicere. Haoj dus de wepsait in de gate!
Vastelaoves
Vereiniging de Rabbedabben
Noewe inwoeëner van ós
dörp?
Gae zeetj verhoeësdj
nao Haler en gae dinktj: woea kin ich toch die sjoeën
vastelaovesvlag of det sjieke Rabbedab-bieëldje hoole? Mailtj mer
nao de secretaresse, Sabine (kiektj op de contactpagina) en wae
bringe de vlag en/of ut bieëldje aan hoeës (binne Haler). De vlag is
veur 17,50 euro te kaup en ut bieëldje veur 22,50 euro.
Sezoeën 25-26, de
fotoreportaasjes:
Dolle Dinsdig
Nao jaore ónger ein strakke blauw locht de optocht door Haler te
zeen trekke sloog ós de sjrik óm ut hert wie wae de aafgelaupe daag
minusieus de weerapps bekeeke óm te zeen of wae net zoea väöl
poollocht kreege es de Serdelhunj of net zoea väöl raege en hagel
wie de Moerebuuk. Nao ein flinke plensbui róndj half twieë trok de
locht gelukkig ope en kwaam dur ein veurzichtig zönneke teveursjien.
Wae höbbe ut dreueg gehaoje op ein paar klein druppelkes op ut inj
nao. De optocht waas weer geweldjig en de minse aan de kantj van de
waeg (echte heldje die ut toch aangedurfdj höbbe óm te kome kieëke
höbbe genoote van einzelgängers, duo's en sjoeën waages mit sjoeën
groepe!
Sleuteleuverdracht
En op vriedig waas ut de beurt aan de groeëte minse óm de sleutel
oet henj van de burgemeisteres te ontvange. Vorst Rik, dae
aangekondigdj waerdje es Prins Rik I (dae presentator haaj duudelijk
zien hoeëswirk neet gedaon) maakdje dao nog eine gekke slaag van.
Hae beloofdje de burgemeisteres det hae veur Valentijnsdaag zien
prinses Ingrid zooj traktere op ein ontbijt mit kerboet. Wae höbbe
achteraaf begrepe det det ontbijt verlaatj waas en det det pas rondj
de middig plaats heet gevónje (en neet in bed).
|
Jeugd
sleuteleuverdracht
Op donderdig 12 fibrewari kreeg prinses Danée de sleutel
euverhendjigdj van ós burgemeisteres mevr. Schmalsläger. De
jeugdroad veurdje nog ein denske mit zang op oppe bühne en daonao
barsjde ut fieëst veur de jeugd pas good los. Ze höbbe zich
köstelijk vermaaktj en de vastelaovendj op dees maneer good
aafgetraptj!
Bóntje Aovendj
Op zaoterdig 7 fibrewari waas ut den eindelijk zoeawieëd: de
artieste koste de bühne op veur ut opveure van häör tot in perfeksie
geoefendje stukske. De zaal leep vanaaf half acht good vol en ut
bleef mer binnekome totdet ut begos. Taofel en steul móste
biegesleiptj waere om idderein en plaetske te gaeve. Eine good
bezochdje Bóntje Aovendj dae gevuldj waas mit mer leefst 17 stukskes.
Eine geweldjige aovendj!
 Prinsesserecepsie
op zónjig 1 fibrewari waas ós eige recepsie. Ut waas gezellig druk
en behalve femilie en vereiniginge oet Haler en anger
belangstellendje waoor de Serdelhunj, de Moerebuuk en de
Puinesjödders dur auch bie. En neet te vergaete de laifmeziek van de
Honjskepel van de Serdelhunj! Wae höbbe genoote!
Bezeuk aan de
Moeërebuuk
Op zaoterdig 17 jannewari zeen wae op
receptie gegange biej os vrunj de Moeerebuuk. Dao zeen wae werm
ontvange door Vorst Steef. Wie wae oppe buhne kwome heet prinses
Danee met heur adjudante Joya en Lyva ein sjoean en duudelik waord
gericht toet Prins Stan en zien adjudante Mats en Teun. Daonao hubbe
die ein lekkere snuik-taart gekrege. Prins Tim heet same met zien
prinses Myrthe nao ein kort stichtelik wäördje van Vorst Rik ein
prins-heerlik apres-waterski-pakket gekrege. Oeteindelik hubbe wae
der nog ein paar gepitsj en zeen wae op hoes aan gegange. Ut waas
ein gezellige aovendj.
 Bezeuk
aan de Serdelhunj
Op zónjig 11 jannewari tooge wae nao Hunsel óm de prinse te gaon
felicitere! Utr waas dao vrieët druk en auch nog bloodheit in de
zaal. Mer de stumming zoot dur waal geweldjig in en wae höbbe ós dao
köstelijk vermaaktj!
Kerboetaksie
Op vriedig 12 december tooge wae mit de jeugdraod door ut dörp óm de
bestellinge róndj te bringe. Van te veure ieërst efkes eine lekkere
hamburger gesnaajdj die door óze topkok Roy woore klaorgemaaktj.
Auch de Vastelaoves Gezét waerdje hoeës aan hoeës róndjgebrachtj. Ut
waas dur fris aan mer waal gezellig!
Prins Oetroope
Op zaoterdig 6 december höbbe wae de
noewe Prins(es) oetgeroope. Nao ein jaor oetprobere same mit ein
anger prinses kinne wae vol trots presentere Prinses Danée, saame
mit heur adjudante (en zusse, wie biezönjer is det) Lyva en Joya.
Prinses Danée, adjudante Lyva en Joya gaon mit dees daag veurop
ónger heur motto:
Met 3 zusse veurop, zette wae hieël Haler de ganse Vasteloavendj op
ziene kop
ALAAF!!!!
Komendje activiteite...
|
